بعد السلام عليكم من باب المشاركة في نشر ثقافة الجودة بمرئيات مختلفة للزملاء ..هنا واحد من الأصدقاء المُبدعين في موقع اللينكدإن - كتب عدد أربعين نصيحة لكل الموظفين الجُدد ال ناويين يشتغلوا في أقسام الجودة بالشركات والمصانع وأيضاً للشغالين حالياً ويريدون تطوير مهاراتهم - كلام الصديق مرفق هنا مباشرةً -تحياتي م.محمدهشام خطاب ........................ ISLAM HELALL Food Inspector نقول تاني 🎤 لو بتبدأ كاريرك في الجودة اقرا دول بعناية .. بإذن الله يفرقوا معاك: ١- بتاع الجودة مش ظابط شرطة وباقي الإدارات مش خارجين عن القانون. ٢- إفهم ال process قبل ما تتكلم. ٣- إسمع قبل ما تتكلم. ٤- لو كلامك هيمنع مشكلة أو يحل مشكلة إتكلم. ٥- نظافتك الشخصية وهندامك هما عنوانك وسمعتك. ٦- إنت مسئول عن المشكلة ومسئول عن الحل. ٧- إوعى تحط قاعدة إنت نفسك مبتطبقهاش. ٨- متستنصحش. ٩- متكدبش. ١٠- متخافش من حد. ١١- إتعلم تاخد قرار. ١٢- تراجع عن قرارك فورا لو اتأكدت انه غلط. ١٣- إستعين بأهل الخبرة .. اللي أخلاقهم عالية فقط. ١٤- إنت ومديرك واحد .. ولازم يبقى قراركم واحد. ١٥- لو انت مدير على ناس كبرهم واحترمهم وعلمهم ياخدوا قرار وادعمهم .. هترتاح وهتكبر بيهم في المكان. ١٦- متقولش معلومة ملهاش مرجعية. ١٧- الأرقام هي اللي هتدي مصداقية لكلامك. ١٨- الإكسل والباوربوينت مش رفاهية. ١٩- إجتهد. ٢٠- متبخلش على حد بمعلومة. ٢١- إحترم الكبير. ٢٢- إحترم الأقدمية. ٢٣- إحترم العلم. ٢٤- إحترم التسلسل الوظيفي. ٢٥- تعبيرات وشك ولغة الجسد أهم من الكلام. ٢٦- الصدمات هتقويك. ٢٧- متشاركش في إشاعات وطاقة سلبية. ٢٨- متشاركش في ظلم تحت أي ظرف. ٢٩- تجاوز عن الخطأ الغير متعمد. ٣٠- إوعى تتجاوز عن خطأ متعمد. ٣١- متشخصنش الخلافات. ٣٢- متستعجلش التقدير .. حتى لو مجاش خالص .. كمل اجتهاد صدقني وانت الكسبان. ٣٣- إقبل بعيوبك واشتغل عليها. ٣٤- متقولش رأيك إلا لما تحس انه هيضيف وهيتسمع .. ولو قلته صمم عليه طالما متأكد منه. ٣٥- خليك واثق في نفسك مهما حصل. ٣٦- متخليش حد يسرق مجهودك مهما حصل. ٣٧- حافظ على كرامتك مهما حصل. ٣٨- إخلص للمكان اللي انت بتشتغل فيه. ٣٩- إسمع لكل النصايح واعمل بالنصيحة اللي تناسب شخصيتك وظروفك. ٤٠- متشاركش تفاصيل حياتك الشخصية مع حد.